1ይ ሰሙን

“ስጕምተይ ኣብ ኣሰርካ ይጽናዕ፣ ኣእጋረይ ሰንከልከል ኣይበላን።” መዝ 17፡ 5

ከም ክርስትያን ኣብዚ ምድራዊ ጉዕዞና እንክተሎን እንስዕቦን እንተሃልዩ፡ እቲ መራሕና ዝኮነ ጐይታ የሱስ ክርስቶስ እዩ። ጐይታ የሱስ ኣብ ናይ ምድሪ ዘመን ህይወቱ ብኹሉ ነገር ሞደልና ምዃኑ ኣርእዩ እዩ። እዚ ኣብ ናይ ምድሪ ኣገልግለቱ ዘርኣዮ ህይወት፡ ንዓና ንዕኡ ተከትልና ወይ ኣብ ኣሰር ናቱ ምኻድ ከርእየና እዩ ተጋህዱ።  እቲ ኩሉ ከም ሰብ ኮይኑ ኣብ ምድሪ ዝገብሮ ዝነበረ ከኣ ንዓና  ንምምሃር ደኣ እምበር ሰብ ምዃን ደስ ስለዝበሎ ኣይኮነን።

ኣብ ህይወት ክርስትና እቲ ኣዝዩ ክንሕልዎን ክንጥንቀቐሉን ዘለና እምበኣር፡ እቲ ኣብ ኣሰር ናይ መን ንከይድ ከነስተብህል ኣለና። ክርስትና ሓንሳእ ምስ ኣመንካ ዝኣኽል ዘይኮነስ ነን መዓልቱ ዝንበር ናብራ እዩ። መዓልታዊ ከም ለባም ከመይ ገርካ ብጥንቓቀ ክትመላለስ ኣለካ እና ኣስተውዓልካ እትመላለሶ እዩ። መዓልታዊ በቲ ቃል ኣምላክ ዝህበካ መረዳእታ እትነብሮ ወይ እትጉዓዞ ናብራ እዩ። ስለዚ ከኣ እዩ ጐይታ ደጋግሙ ካብ ብዙሕ ነገር ክንጥንቀቅ ዝነግረና።

ኣብ ህይወትና ኣብቲ ናይ ጐይታና የሱስ ክርስቶስ ኣሰር እናረገጽና ንጉዓዝ ከምዘለና ወይ ንከይድ ከምዘለና መዓልታዊ ከነስተውዕሎን ክንሕልዎን ዘለና እዩ። በቲ ናቱ ኣሰር ምውሓጥ ክኮነልና መዓልታዊ ክንጽልን ኣብ ኣካይዳና ከነንጸባርቅን ኣለና። ስለዚ ከኣ እዩ የሱስ ደቀ መዛምርተይ ኢሉ ዝሰመየና። ናይ ክርስቶስ ሰዓብቲ ተባህልና ንጽዋዕ እንተሃልና፡ ነቲ ንስዕቦ ዘለና ደኣ እምበር ንገዛእ ርእስና ክንመስል የብልናን።

መዝ 17፡5 “ስጕምተይ ኣብ ኣሰርካ ይጽናዕ፣ ኣእጋረይ ሰንከልከል ኣይበላን።”

1ቆረ 11፡1 “ከምዚ ኣነ ንክርስቶስ ዝመስሎ ዘሎኹ፡ ንስኻትኩም ንኣይ ምሰሉ።”