About us

በቲ ናይ ዘልኣለም ንጉስን ፈጣርን መድሓንን ዝኾነ ሓደ ኣምላኽ ነኣምን። ንሱ ፍጹሙን ቅዱስን ጻድቕን ፍቕሪን ሓቂ ዝኾነ ኣምላኽ እዩ። ንሱ ንዘለኣለም ብርእሱ ህያዉ ከም ዝኾነ ርእሱ ዝገለጸ ኣምላኽ እዩ። ሓደ ኣካል ብሰለስተ ትስብእቲ ዝግለጽ፡ እግዚኣብሄር ኣቦ፡ እግዚኣብሄር ወልድ፡ እግዚኣብሄር መንፈስ ቅዱስ እዩ።

መጽሓፍ ቅዱስ እቲ እንኮ ብኣምላኽ ዝተደረኸ፡ ዘይወድቕ፡ ጌጋ ዘይብሉ፡ ትኹል ቃል ኣምላኽ እዩ።

ወዲሰብ ንኣምላኽ ምእንቲ ኬስተማቕር ብመልክዕ ኣምላኽ ዝተፈጥረ ምዃኑ ንኣምን። ወዲ ሰብ ግን ብፍቓዱ ነቲ ምእንትኡ ኢሉ ዝተፈጥረሉ ጎይትነትን ክብርን ኣምላኽ ከም ዝነጸገ ንኣምን። በዚ ምኽንያት ድማ ሕማም፡ ሞትን ፍርዲን ናብዚ ዓለም ከም ዘኣተወ፡ ከም ሳዕቤኑ ድማ ሕጂ ጽልዋን ሳዕቤን ሓጢኣት ኣብ ልዕሊ ፍጥረት ኣንጸላልዩ ከም ዝርከብ ንኣምን።

ብጎይታና የሱስ ክርስቶስ ንኣምን፡ እቲ ሓደን እንኮን ወዲ ኣምላኽ ብመንፈስ ቅዱስ ተጠኒሱ፡ ካብ ድንግል ማርያም ከምዝተወልደ፡ ናይ ኣምላኽ መሲሕ ምዃኑ፡ ናይ ኣምላኽ መንግስቲ ኣብዚ ምድሪ ክእውጅ ምእንቲ ብመንፈስ ቅዱስ ዝመልኤ ምዃኑ ንኣምን። ምእንቲ ሓጢኣትና ከም ዝተሰቕለ፡ ከም ዝሞተ፡ ከም ዝተቐብረ፡ ከም ዝተንስኤ፡ ናብ ሰማይ ከም ዝዓረገ፡ ሕጂ ድማ ኣብ ህላውነት እግዚኣብሄር ኣቦን ኣብ ማሕበሩን ህያዉ ከምዝኾነ፡ ፍጹም ኣምላኽን፡ ፍጹም ሰብን ምዃኑ ንኣምን።

ኣብ መንነትን ስራሕን ጎይታና የሱስ ክርስቶስ ብምእማንና፡ ብጸጋ ኣምላኽ ከም ዝደሓንና ንኣምን። ንጎይታና የሱስ ክርስቶስ ከም መድሓኒኦምን ጎይታኦምን ብእምነትን ንስሓን ዝተቐበሉ ዘበሉ ኩሎም ናብ ሕብረት ኣምላኽ ክሕደሱ ከም ዝኽእሉ ነኣምን። መንፈስ ቅዱስ እቲ ናብ መንግስቲ ኣምላኽ ከም ውሉድ ክንኣቱ ምእንቲ ዝረትዓና፡ ዘሔድሰና፡ ዘጽድቐና፡ ዘንጽሃናን ውሉድ ዝገብረና ምዃኑ ንኣምን።

በቲ ኣብ ህይወት ክርስትያን ዝሓድር፡ ቀጻሊ ዝቕድስ ሓይሊ መንፈስ ቅዱስ፡ ብእኡ ኣቢሉ ድማ ሓደ ክርስትያን ቅዱስ ህይወት ንኽነብር፡ መለኮታዊ ኣገልግሎት ንኽዓዪ ዘኽእሎ መንፈስቅዱስ ምዃኑ ንኣምን። ብመሰረት ግብ1፡4-8 ግብ 2፡4 ብጥምቀት መንፈስ ቅዱስ ሓይሊ ኣምላኽ ተቐቢሎም መሰኻኽር ኪኾኑ ምእንቲ ኣብ ኣመንቲ ከም ዝፈሰሰ ነኣምን።

እቲ የሱስ ክርስቶስ ኣብ መስቀል ዝሰርሖ ናይ ምድሓን ዓወት ኣብ ልዕሊ ሓይሊ ጸላኢ፡ ሓሶት፡ ሕማም፡ ስቓይን፡ ሓርነት ከም ዝህብ ንኣምን።

ቤተክርስትያን በቶም ብጎይታና የሱስ ክርስቶስ ዘኣመኑ ኩሎም ሰባት ዝቖመት ምዃና ነኣምን። ኣምላኽ ንቤተክርስትያን ናይ ጥምቀትን ቅዱስ ቁርባንን ስርዓት ክትፍጽም ከም ዝሃባ ነኣምን። ዕዮ የሱስ ክርስቶስ ኣብዚ ምድሪ ክትቅጽል፡ ስራሕ ጸላኢ እናፍረስት፡ እናሰበኸት፡ ነቲ ጥዑም ብስራት ፍቕሩ ዝኾነ ወንጌል እናነበረትሉ፡ ንህዝብታት እናጥመቐትን፡ ንኣምላኽ ከፍቅሩን ክእዘዙን እናመሃረት፡ ደቀመዛሙርቲ ብምግባር መንግስቱ ከተስፍሕ ቤተክርስትያን ከም ዝተጸዉዔት ንኣምን።

በታ እናወሰኸትን እናዓበየትን እትኸይድ መንግስቲ ኣምላኽ፡ በቲ ብኽብርን ብግህዶን ዝግለጽ ብሩኽ ተስፋ ምጽኣት ጎይታና የሱስ ክርስቶስ፡ ምስታ ሰዓሪት መርዓቱ - እታ ቤተክርስትያን ምእንቲ ክገዝእ ከም ዝምለስ ነኣምን።

መንግስተ ሰማይን ሲኦልን ዝበሃሉ ስፍራታት ሓቀኛ ቦታታት ምዃኖም ነኣምን። ትንሳኤ ናይቶም ዝጠፍኡን ዝደሓኑን ከምዘሎ ነኣምን፡ እቶም ዝጠፍኡ ናብ ናይ ዘለኣለም ሞት፡ እቶም ዝደሓኑ ድማ ናብ ናይ ዘልኣለማዊ ህይወት።

ብዛዕባ ኣምላኽ

ኣምላኽ ብባህሪኡ ጸጋዊ፡ ለዋህ፡ ንቁጥዓ ዝሑል፡ ዘየቋርጽ ወሓዚ ፍቕሪ ዝኾነ ኣምላኽ እዩ። ንሱ ናይ ኩሉ መጀምርታን መወዳእታን እዩ። ኩሉ ኣብ ኣምላኽ እዩ ዕላማ ህላዌኡ ዝረክብ፡ ኩሎም ህዝብታት ምድሪ’ውን ካብ እዮም ደግነቶም ዝረኽብዎ። ኩለንትንኡ ሰናይ እዩ፡ ኣብኡ ገለ ክፍኣት ዘይብሉ ኣምላኽ እዩ። ብዘይ ቅድመ-ኩነት ሕያዋይን ናይ ለውሃት ምኽሪ ፍቕሪ ንኩሉ ደቂ-ሰብ ዘለዎ ኣምላኽ እዩ። ኩሎ ክፍኣትን መግደራን ካብቲ ክፉእ ጥራይ እዩ። ኣምላኽ ክፉእ ተጠቂሙ ንደቂ ሰባት ሕያዉነቱ ኣይገልጸሎምን እዩ። ነቲ ድምጹ ክሰምዕ ዝደሊ ዘበለ ኩሉ፡ ኽዛረቦን ክርከበሉን ዝደሊ ኣምላኽ እዩ።

ውዑይ ፍቕሪ ንኣምላኽ

ጥቡቕ፡ ቅንዕቲ፡ ሕጉስቲ፡ ብምሉእ ልቢ ዝኾነት፡ ጽንዕቲ፡ ግብዝና ዘይብላ፡ ንፍቓድን ትእዛዝን ኣምላኽ ፍጹም ምእዛዝን ምግዛእን እትግለጽ ፍቕሪ ክትህልወና ንጽዕት። ናይ ኣምላኽ ዘይተቋርጽ ፍቕሪ እተንጸባርቕ ፍቕሪ ሒዙ ዝጎዓዝ ህይወት ክነርኢ ንጽዕት። ንሕና የዕሩኽ ኣምላኽ ኢና።

ፍቕሪ ንኻልኦት

ርእስኻ ክሒድካ ናይ ኣምላኽ ዘይቅደምኩነታዊት ፍቕሪ ነጸብራቕ ኽንከውን ካብቲ እነኽብሮ ክብርታት እዩ። ሰባት ኣብ ቅድሜና ውሕሰነት ክረኽብሉ ዝኽእሉ ተቐባልነት፡ ምክብኻብ፡ ድንጋጽን ሕያዉነትን ክነርኢ ተጸዊዕና ኢና። ኣምላኽ እቲ ምስ ደቁ ዘለዎ ሕብረት ክንዮ ድኻሞምን ጉዳያቶምን ስለ ዘኽብሮ፡ ንሕና’ውን ምስ ደቂ ኣምላኽ ዘለና ሕብረት ክንዮ ድኻሞምን ጉዳያቶምን ኣገልግሎታትናን ኢና እነኽብሮም። ከምቲ ፍቕሪ ኣምላኽ ዘይከፈልናሉ፡ ካልኦት’ውን ፍቕርና ንክረኽቡ ክኸፍልዎ ዝግብኦም ነገር የለን።

ኣምልኾን ሓጎስን

በቲ ኣምላኽ ርእሱ ዝገልጸሉ ዓይነት ኣምልኾ ዝግበር ካብ ልቢ ዝኾነ፡ ሓጎስ ዝመልኦን ህላዉነት ኣምላኽ ናብ ልቢ ሰብን ህይወቶምን ዘዕዝዝን፡ ብሓጎስ መንፈስ ቅዱስ ህይወት ሰባት ክልዉጥ ዝኽእል ሓይሊ ኣምላኽ ዘግህድ፡ ግብሪ ምላሽ ፍቕሪ ነኽብሮ ኢና። ሓጎስ ናይ ክርስትያን ንቡር ህይወት እዩ።

ንክርስቶስ ምምሳል

የሱስ ክርስቶስ እቲ ናይ ኣምላኽ እንኮ ዝተገልጸ ፍቓዱን፡ መገዲ ሕብረት ምስ ደቂ ሰባትን እዩ። ኣብ ክርስቶስ ኢና እቲ ዝለዓለ ምሳሌ ናይ ኣምልኾን ቅድስናን ዝኾነ ሓድሽ ህይወት እንረኽቦ። ቅንዕናን ዘይተመቓቕለ ሓድነት ልቢ ዘለዎ እሙንነት። ኽሉ ትሕዝቶናን ተግባርናን ካብቲ ብፍጹም ብልብና ኣዉዲቕና ዝተወክልናዮ ኣምላኽ ምዃኑ ዝገልጽ ትሕትና፡ ክንዮ ግምትና ዝኾነ ኣምላኽ ዝመርጾ መገድታትን ምርጫታት ነቐድም። ኣብ ሕልምና፡ ኣመለኻኽታናን ተግባርናን፡ ነቲ ናይ ኣምላኽ ዝለዓለ መምዘኒን መዔቀኒን ዝገልጽ ብሉጽነት ንምንጽብራቕ ርእስና ምሃብ።

ጸጋ

ትርጉም ወንጌል ካብ ዕዮን መንነትን ጎይታናን መድሓኒና የሱስ ክርስቶስ ኣይበዝሕ ኣይንኪን እዩ። ኣብ ኩሉ እቲ ንገብሮ ንሱ እቲ ቀዳማይ ኪኸውን ኢና ንድልዮ። ጸጋን እቲ ውዱእ ዕዮ መስቀል መወዳእታ ሸቶ ናይ ኩሉ ኣገልግሎትና እዩ። ኩለንትናና ብዛዕባ የሱስ ክርስቶስን እቲ ውዱእ ዕዮኡን ኢና።

ጨውን ብርሃንን

ናብ ዓለም ብርሃን ከነምጽእ፡ ንደቂሰብ ከም ጨው ኮይንና ካብቲ ጸልማት ሕዝዎ ዝመጽእ ብልሽዉና ክንዕቅቦ፡ ናብ ዕርቂ ክንመርሖ፡ ኣብ ኩሉ መዳያት ህይወት ናይቲ ኩሉ ክልዉጥ ዝኽእል ልቢ ኣምላኽ ጽልዋ ምግሃድ። በታ ገስጋሲት መንግስቲ ኣምላኽ፡ ንብዙሓት ብሓይሊ ኣምላኽን ጥበብን ምዕጣቕ። ኣገልግሎትና ብዛዕባ ምንቕቓሕ፡ ንምዕጣቕ፡ ንምሕዳስን ቅዱሳን እዩ።

ማሕበረሰብ

ሓቀኛ ሕብረትን ተሓታትነት ዘለዎ ማሕበረስብ ምህናጽ፡ ንርእሶም ብንግስነት ዝርእዩ፡ ከም ሕሩያት ወልዶ ገይሮም ብሓይሊን ባህሊን እታ መንግስቲ ኣምላኽ ዝተዓጥቁ ማሕበረሰብ ምትንሳእ። ብዘይ ፍርሒ ኣብ ልዕሊ ኩሉ ዉዲት ጸላኢ፡ ብኹሉ ርዳኢትን ቅንኣትን ብመለኮታዊ ሓይሊ ኣምላኽ ክመላለስ ዝኽእል ማሕበረሰብ ምህናጽ። መልክዕ ኣምላኽ እተጸንባርቕ ስድራቤት ምሕያል፡ ንመንእሰያት ብሓይሊ፡ ብፍቕሪ፡ ብራእይ የሱስ ክርስቶስ ምሕያል።

ክብርቲ ቤተክርስትያን

ናይታ ብኩሎም ኣመንቲ ዝቖመት ክብርቲ ኣካል ክርስቶስ ልዕል ዝተዋህባ ልዕል ዝበለ ጻዉዒት ነኽብር። ከምኡ’ውን ነቲ ኣምላኽ ንቤተክርስትያን ዝሃባ ናይ ምጉሳይ ሓላፍነትን ስልጣንን ነኽብሮ። የሱስ ክርስቶስ ርእስን ምልኣትን ፍጽምናን ናይታ ኣካሉ ምዃኑ ንኣምን። ቤተክርስትያን ክንዮ መሬታዊት ትካል ምዃና፡ ምስ ኣእምሮን ልቢን የሱስ ክርስቶስ ሓደ ክሳብ እትኸውን ክትዓቢይ እተጸዉዔት ፍጥረት ምዃና ንኣምን።